Istoricament era Fondacion Vincle tostemp a agut era intencion d’incidir ena normalizacion dera lengua catalana en sector dera empresa. Açò signifique crear sinergies a trauès deth cercle vertuós empresa – Administracion – consumidor. Per çò que hè ara lengua, cada un aurie de complir damb eth sòn ròl: era empresa a d’èster respectuosa damb era lei e es drets deth consumidor, en relacion, tanben, damb er aspècte lingüistic; era Administracion a d’ajudar e saber persuadir as empresaris damb es sues accions e hèr complir era lei de manèra intelligenta e graduau; e eth consumidor, a part de consumir damb responsabilitat, tanben a de reclamar es sòns drets lingüistics – entre d’auti – quan aguesti son vulneradi. Premanim un nau Plan dera lengua ena empresa. Vo’n informaram mès endeuant.

Cream era web « Al comerç, en català » entà amiar a tèrme ues bones practiques lingüistiques en comèrç (2015)

Era Fondacion Vincle, damb era collaboracion dera Plataforma pera Lengua, a lançat un nau utís entàs establiments e comèrci des territòris de parla catalana, era web “Al comerç, en català. Normativa i bones pràctiques per a una bona atenció lingüística al comerç”.

www.comerçencatala.cat ei un portau dubèrt de consulta adreçat a tot tipe d’establiments entà realizar ua practica responsabla per çò que hè ara lengua enes relacions damb es clients. Er utís includís un apartat de bones practiques per airaus damb prepauses responsables en aspèctes tan quotidians coma era atencion orau e escrita, es panèus o er usatge des hilats sociaus.  Includís tanben prepauses en sectors especifics coma es bars, es restaurants, es lotjaments toristics, es empreses d’assegurances, es agéncies de viatges o es entitats bancàries.

Tanben se pòden consultar recorsi e era normativa qu’afècte a cada airau e 10 punts basics que tot comèrç aurie d’auer en compde ara ora d’adreçar-se ath client.

Consultatz-la!

Presentam era web « Business in catalan » (2014)

Era Fondacion Vincle, damb era collaboracion dera Plataforma pera Lengua, a creat era web  businessincatalan.cat . Se tracte dera version en anglés dera web empresaencatala.cat , que vò informar e estimular as empreses estrangères qu’opèren en Catalonha e enes tèrres de parla catalana entà qu’utilizen mès e milhor era lengua catalana enes sòns productes e ena relacion damb es sòns clients, trabalhadors e era Administracion.

Guardatz-la aciu.

Convènis damb era Confederacion de Comèrç de Catalonha e damb era Fondacion CECOT (2012)

Eth 14 de deseme de 2012 era Fondacion Vincle signèc un acòrd de collaboracion damb era Confederacion de Comèrç de Catalonha, e eth 17 de deseme de 2012 signèc un aute acòrd de collaboracion damb era Fondacion CECOT Persona e Trabalh. Enes dus casi, era objectiu deth convèni ei difóner e promòir accions conjuntes damb es entitats entà qu’eth catalan sigue encara mès present e mès abituau enes sectors deth comèrç, deth trabalh e des empreses coma lengua pròpria e oficiau de Catalonha, e tanben incorporar er element lingüistic laguens dera responsabilitat sociau des empreses e ajudar-les a adaptar-se as entorns cada viatge mès internacionalizadi e multilingües.

Presentam era naua web entath catalan ena empresa (2012)

Damb era volontat de divulgar contenguts realizadi pera Fondacion Vincle que poguen èster utils entara societat, presentam aciu era web Empresaencatala.cat, qu’ei un utís elaborat pera Fondacion Vincle e era Plataforma pera Lengua entà totes aqueres empreses qu’agen es següents propòsits:

• introdusir eth catalan d’acòrd damb era legislacion e damb ua bona practica lingüistica
• aprigondir o completar un plan d’actuacion der usatge deth catalan en relacion damb eth consumidor e d’auti airaus dera empresa

Empresaencatala.cat, per motius de legislacion, s’adrece a totes es empreses o multinacionaus que comercializen es sòns productes o servicis en Catalonha e, per tant, ac hèn jos era emparança des Leis aprovades en Parlament de Catalonha. Tot e atau, era aplicacion des practiques prepausades pòt hèr-se extensiva a tot eth domeni lingüistic dera lengua catalana. Atau, per exemple, ua empresa qu’actue en Valéncia, en Andòrra o en Malhòrca pot desvolopar exactament es madeishes instruccions e practiques prepausades en Catalonha. De hèt, tot soent se hè referéncia ara legislacion especifica d’aguesti territòris.

Es contenguts d’ Empresaencatala.cat tracten tant era vessant legau e era comerciau, coma era dera responsabilitat sociau.

Presentacion dera guida e eth desplegable A l’empresa, en català (2011-2012)

S’er objectiu basic dera empresa ei arténher es maxims beneficis damb era plea satisfaccion deth client, aisidament er usatge normau deth catalan complís andús requisits: ei pleament rendible economicament e afavorís e condicione era qualitat deth servici damb eth client. Eth document que presentam non ei sonque un utís entà totes aqueres empreses que volguen introdusir eth catalan enes critèris basics d’actuacion, senon tanben un supòrt entà totes aqueres autes que volguen aprigondir o completar un plan d’actuacion per çò que tanh ar usatge dera lengua catalana en relacion damb eth consumidor o client, damb es grops d’interès e damb eth foncionament intèrn dera empresa; un manuau de bones practiques. Poderíem díder que se tracte d’ua seguida d’instruccions minimes se volem actuar damb responsabilitat, e ath madeish temps, ua referéncia entà solucionar quauqui dobtes. Ath delà, ac vò hèr de forma senzilha e facila, utila, e pensant justament enes empresaris o es persones responsables deth dessenh e era decision d’aguestes politiques.

Era Fondacion Vincle e era Plataforma pera Lengua publiquèren eth libret A l’empresa en català. Un mercat d’oportunitats. Manual per a unes bones pràctiques lingüístiques a l’empresa (2011). Entà divulgar d’ua forma mès senzilha eth messatge, tanben se’n hec ua version resumida en desplegable.

Era guida se presentèc en Cercle d’Economia, en Barcelona, eth 15 de mai de 2012 damb era preséncia de diuèrses autoritats, organizacions empresariaus e empresaris. Quauqui mesi mès tard, eth 31 de gèr de 2013, se presentèc ena Cramba de Comèrç de Girona.

Podetz consultar era guida clicant aciu: 2011 Manuau A l’empresa en català e eth desplegable aciu: 2011 Desplegable A l’empresa en català